行這呢久　是不是感覺有淡薄仔累

行遮爾久 是毋是感覺有淡薄仔忝

kiânn tsiah-nī kú, sī-m̄-sī kám-kak ū tām-po̍h-á thiám

趕緊找一個無聲的所在

趕緊揣一个無聲的所在

kuánn-kín tshuē tsi̍t-ê bô-siann ê sóo-tsāi

一個會凍喘大氣的所在

一个會當喘大氣的所在

tsi̍t-ê ē-tàng tshuán-tuā-khuì ê sóo-tsāi

緩緩仔躺落來

寬寬仔倒落來

khuann-khuann-á tó--lo̍h-lâi

撐這呢久　險險嘛地要賣記仔要衝啥物

弓遮爾久 險險仔咧欲袂記得 欲創啥物

king tsiah-nī kú, hiám-hiám-á teh-beh bē-kì-tsit, beh tshòng siánn-mih

趕緊找一個無聲的所在

趕緊揣一个無聲的所在

kuánn-kín tshuē tsi̍t-ê bô-siann ê sóo-tsāi

一個會凍放輕鬆的所在

一个會當放輕鬆的所在

tsi̍t-ê ē-tàng pàng khin-sang ê sóo-tsāi

慢慢仔想看嘛

慢慢仔想看覓

bān-bān-á siūnn khuànn-māi

踮在這座銅牆鐵壁的深山林內

踮在這座 銅牆鐵壁的深山林內

tiàm tsāi tsit tsō, tâng-tshiûnn thih-piah ê tshim-suann-nâ-lāi

紛紛擾擾　吵吵鬧鬧的日子活下來

紛紛擾擾 吵吵鬧鬧的日子活落來

hun-hun-jiáu-jiáu, tshá-tshá-nāu-nāu ê ji̍t-tsí ua̍h--lo̍h-lâi

安怎艱苦的心事　顛倒愛吞落腹肚內

按怎艱苦的心事 顛倒愛吞落腹肚內

án-tsuánn kan-khóo ê sim-sū, tian-tò ài thun lo̍h pak-tóo-lāi

踮在這個漂流之島　無情的世界

踮在這个漂流之島 無情的世界

tiàm-tsāi tsit-ê phiau-liû tsi tó, bô-tsîng ê sè-kài

生生死死　分分合合的日子看過來

生生死死 分分合合的日子看過來

sing-sing sí-sí, hun-hun ha̍p-ha̍p ê ji̍t-tsí khuànn--kuè-lâi

安怎摻血的目屎

按怎摻血的目屎

án-tsuánn tsham-hueh ê ba̍k-sái

就愛一擺擱流一擺

著愛一擺閣流一擺

tio̍h-ài tsi̍t-pái koh lâu tsi̍t-pái

痛這呢久　親像浮在無底的大海

疼遮爾久 親像浮佇無底的大海

thiànn tsiah-nī kú, tshin-tshiūnn phû tī bô té ê tuā-hái

趕緊找一個無聲的所在

趕緊揣一个無聲的所在

kuánn-kín tshuē tsi̍t-ê bô-siann ê sóo-tsāi

一個真正無聲無息的所在

一个真正 無聲無說的所在

tsi̍t-ê tsin-tsiànn, bô-siann-bô-sueh ê sóo-tsāi

恬恬仔　一個人　哭悲哀

恬恬仔 一个人 哭悲哀

tiām-tiām-á, tsi̍t-ê-lâng, khàu pi-ai