│人人叫我是總舖師

人人叫我是總舖師

lâng-lâng kiò guá sī tsóng-phòo-sai

│上界出名世賢煮菜

上蓋出名是𠢕煮菜

siōng-kài tshut-miâ sī gâu tsú-tshài

│料理好吃是蓋全台

料理好食是蓋全臺

liāu-lí hó-tsia̍h sī kài tsuân-Tâi

│名聲轟動是全世界

名聲轟動是全世界

miâ-siann hong-tōng sī tsuân-sè-kài

│來來來　手拿菜刀　對這來

來來來　手攑菜刀　對遮來

lâi, lâi, lâi, tshiú gia̍h tshài-to, tuì tsia lâi

│是因為那個漏腳才他子娶太太

是因為彼个躼跤才　怹囝娶太太

sī in-uī hit-ê Lò-kha-Tsâi in kiánn tshuā thài-thài

│才叫我這個糊塗ㄟ總舖師　要來辦酒菜

才叫我這个糊塗的總舖師　欲來辦酒菜

tsiah kiò guá tsit-ê hôo-tôo ê tsóng-phòo-sai beh lâi pān tsiú-tshài

│熊供走入造腳內　酸醋拿來試看賣

兇狂行入灶跤內　酸醋提來試看覓

hiong-kông kiânn-ji̍p tsàu-kha lāi, sng-tshòo the̍h-lâi tshì khuànn-māi

│氣味擱不錯

氣味閣袂䆀

khì-bī koh buē-bái

│難怪查某人吃醋ㄟ時準　才會那麼可愛

莫怪查某人食醋的時陣　才會遐可愛

bo̍k-kuài tsa-bóo-lâng tsia̍h-tshòo ê sî-tsūn, tsiah-ē hiah khó-à

│我ㄟ料理是奇奇假怪怪　有吃過ㄟ人都會知

我的料理是奇奇佮怪怪　有食過的人攏會知

guá ê liāu-lí sī kî-kî kah kuài-kuài, ū tsia̍h--kuè ê lâng lóng ē tsai

│呀那不吃過ㄟ人請恁試看賣

啊若無食過的人　請恁試看覓

ah nā bô tsia̍h--kuè ê lâng, tshiánn lín tshì khuànn-māi

│台先鴨蛋來卡破　賣煎鴨蛋參麵線

代先鴨卵來敲破　欲煎鴨卵摻麵線

tāi-sing ah-nn̄g lâi khà-phuà, beh tsian ah-nn̄g tsham mī-suànn

│鴨蛋下鼎是比波彈　白仁走四散　紅仁才參頭出來看

鴨卵落鼎是嗶噗彈　白仁走四散　紅仁才探頭出來看

ah-nn̄g lo̍h-tiánn sī pi̍t-phok tuānn, pe̍h-jîn tsáu sì-suànn, âng-jîn tsiah tham-thâu tshut-lâi khuànn

│看看看

看看看

khuànn, khuànn, khuànn

│這齣是腰子炒豬肝　豬肝著要炒厚爛爛

這齣是腰子炒豬肝　豬肝著愛炒予爛爛

tsit tshut sī io-tsí tshá ti-kuann, ti-kuann tio̍h-ài tshá hōo nuā-nuā

│才不損害著阿婆ㄟ嘴齒岸

才袂損害著阿婆的喙齒岸

tsiah buē sún-hāi tio̍h a-pô ê tshuì-khí-huānn

│剎下去　這齣著是紅燒魚五柳枝

紲落去這齣　就是紅燒魚五柳枝

suà--lo̍h-khì tsit tshut, tiō-sī âng-sio-hî ngóo-liú-ki

│酸醋加四兩二　才ㄟ凍治療病相思

酸醋加四兩二　才會當治療病相思

sng-tshòo ka sì-niú-jī, tsiah ē-tàng tī-liâu pīnn-siunn-si

│擱來這齣龍蝦炒姑菜

閣來這齣　龍蝦炒韭菜

koh lâi tsit tshut, lîng-hê tshá kú-tshài

│凡是不夠力ㄟ尪婿　吃料後才不免擱再驚太太

凡是無夠力的翁婿 　食了後　才毋免閣再驚太太

huân-sī bô-kàu-la̍t ê ang-sài, tsia̍h liáu-āu, tsiah m̄-bián koh-tsài kiann thài-thài

│來哦~今呀日最重要ㄟ著是這齣美國來ㄟ火雞

來喔~ 今仔日最重要的　就是這齣美國來的火雞

lâi--ooh~ kin-á-ji̍t tsuè tiōng-iàu--ê, tsiū-sī tsit tshut Bí-kok lâi ê hué-ke

│這隻火雞　毛長著特別豔麗

這隻火雞　毛生做特別豔麗

tsit tsiah hué-ke, moo senn tsò ti̍k-pia̍t iām-lê

│我想說要來挽幾支起來　送阮那個

我想講欲共挽幾枝仔起來　送阮彼个

guá siūnn-kóng beh kā bán kuí ki-á khí-lâi, sàng gún hit-ê

│呀不擱　這隻火雞真壞性地

猶毋過　這隻火雞誠歹性地

iáu-m̄-koh, tsit tsiah hué-ke tsiânn pháinn-sìng-tē

│我毛假蔡一支　伊加我豆一下

我毛共掣一枝　伊共我啄一个

guá moo kā tshuah tsi̍t-ki, i kā guá tok tsi̍t-ê

│蔡二支　加我豆二下

掣兩枝　共我啄兩个

tshuah nn̄g-ki, kā guá tok nn̄g-ê

│我人氣加伊修面剔嘴巴

我人去共伊修面剃喙䫌

guá lâng khì kā-i siu-bīn thì tshuì-phé

│呀這隻美國火雞實在有影不要X

啊這隻美國火雞　實在有影袂曉衰

ah tsit tsiah Bí-kok hué-ke, si̍t-tsāi ū-iánn bē-hiáu sue

│毛都拔廖廖了

毛都掣了了囉

moo to tshuah liáu-liáu--loh

│也敢逃亡到大街

也敢逃亡到大街

iā kánn tô-bông kàu tuā-ke

│害我追加喘XX

害我逐甲喘怦怦

hāi guá jik kah tshuán-phēnn-phēnn

│我按捺沿路追　伊按捺沿路走沿路飛

我沿路逐　伊按呢沿路走　沿路飛

guá iân-lōo jik, i án-ne iân-lōo tsáu, iân-lōo pue

│可比世界的運動會

可比世界的運動會

khó-pí sè-kài ê ūn-tōng-huē

│說起來實在真笑虧

講起來實在真笑詼

kóng--khí-lâi si̍t-tsāi tsin tshiò-khue

│這隻火雞剎博落起臭溝啊底

這隻火雞煞跋落去臭溝仔底

tsit tsiah hué-ke suah pua̍h lo̍h-khì tshàu-kau-á-té

│我趕緊利用這個機會　加抓返來用洗衣機一直洗

我趕緊利用這个機會　共掠轉來　用洗衣機一直洗

guá kuánn-kín lī-iōng tsit-ê ki-huē, kā lia̍h--tńg-lâi, iōng sé-i-ki it-ti̍t sé

│奇怪啊　洗半點外鐘久　氣味仙洗就洗未退

奇怪啊　洗半點外鐘久　氣味仙洗都洗袂退

kî-kuài--ah, sé puàn-tiám-guā tsing kú, khì-bī sian sé to sé bē thè

│人客客廳坐　等加供供要發性地

人客客廳坐　等甲強強欲發性地

lâng-kheh kheh-thiann tsē, tán kah kiōng-kiōng-beh huat-sìng-tē

│叫我趕緊出火雞

叫我趕緊出火雞

kiò guá kuánn-kín tshut hué-ke

│我就阿奈乾乾脆脆三十六刀七十二塊

我就按呢乾乾脆脆　三十六刀七十二塊

guá tsiū-án-ne kan-kan-tshè-tshè, sann-tsa̍p-la̍k to, tshit-tsa̍p-jī tè

│快速駛豔火　做好才加捧出起請人客

快速使炎火　做好　才共捀出去請人客

khuài-sok sái iām-hué,tsò hó, tsiah kā phâng tshut-khì tshiánn lâng-kheh

│嘿人客看著是美國火雞　阿奈　大家相擠夾

彼人客看著是美國火雞　按呢逐家相爭夾

he lâng-kheh khuànn-tio̍h sī Bí-kok hué-ke, án-ne ta̍k-ke sio-tsinn ngeh

│踢踢咧歸嘴配　踢了後才知影氣味有問題

窒窒咧規喙䫌　窒了後　才知影氣味有問題

that-that--leh kui tshuì-phé, that liáu-āu, tsiah tsai-iánn khì-bī ū būn-tê

│想說要吐出來　又擱驚歹勢啊

想講欲吐出來　又閣驚歹勢啊

siūnn-kóng beh thòo--tshut-lâi, iū-koh kiann pháinn-sè--ah

│只好目睭吉客客　大ㄟ加伊吞落起腹肚底

只好目睭激瞌瞌　大个共伊吞落去腹肚底

tsí-hó ba̍k-tsiu kik kheh-kheh, tuā-ê kā-i thun lo̍h-khì pak-tóo-té

│順剎呃樂我這咧總舖師ㄟ好手藝

順紲呵咾我這个總舖師的好手藝

sūn-suà o-ló guá tsit-ê tsóng-phòo-sai ê hó tshiú-gē

│也會曉煮這樂美國來ㄟ火雞

也會曉煮這號美國來的火雞

iā ē-hiáu tsú tsit-lō Bí-kok lâi ê hué-ke

│人人叫我是總舖師

人人叫我是總舖師

lâng-lâng kiò guá sī tsóng-phòo-sai

│上界出名世賢煮菜

上蓋出名是𠢕煮菜

siōng-kài tshut-miâ sī gâu tsú-tshài

│料理好吃是蓋全台

料理好食是蓋全臺

liāu-lí hó-tsia̍h sī kài tsuân-Tâi

│名聲轟動是全世界

名聲轟動是全世界

miâ-siann hong-tōng sī tsuân-sè-kài

│先生食著笑咳咳

先生食著笑咍咍

sian-sinn tsia̍h tio̍h tshiò-hai-hai

│小姐食著好體材

小姐食著好體材

sió-tsiá tsia̍h tio̍h hó thé-tsâi

│囝仔食著真可愛

囡仔食著真可愛

gín-á tsia̍h tio̍h tsin khó-ài

│不信請恁試看覓

毋信請恁試看覓

m̄ sìn, tshiánn lín tshì khuànn-māi