│有一日咱若老 　找無人甲咱友孝

有一日咱若老，揣無人共咱有孝。

Ū tsi̍t-li̍t lán nā làu, tshuē bô lâng kā lán iú-hàu.

│我會陪你　坐惦椅寮　聽你講少年的時陣　你有外摮

我會陪你，坐踮椅條，聽你講少年的時陣你有偌𠢕。

Guá ē puê lí, tsē tiàm í-liâu, thiann lí kóng siàu-liân ê sî-tsūn lí ū guā gâu.

│吃好吃醜無計較　怨天怨地嘛袂曉

食好食䆀無計較，怨天怨地嘛袂曉。

Tsia̍h hó tsia̍h bái bô kè-kàu, uàn-thinn-uàn-tē mā bē-hiáu.

│你的手　我會甲你牽條條　因為我是你的家後

你的手，我會共你牽牢牢，因為我是你的家後。

Lí ê tshiú, guá ē kā lí khan-tiâu-tiâu, in-uī guá sī lí ê ke-āu.

│阮將青春嫁置恁兜　阮對少年就跟你跟甲老

阮將青春嫁佇恁兜，阮對少年就綴你綴甲老。

Guán tsiong tshing-tshun kè tī lín tau, guán tuì siàu-liân tiō tuè lí tuè kah lāu.

│人情世事已經看透透　有啥人比你卡重要

人情世事已經看透透，有啥人比你較重要。

Lîn-tsîng-sè-sū í-king khuànn-thàu-thàu, ū siánn-lâng pí lí khah tiōng-iàu.

│阮的一生獻乎恁兜　才知幸福是吵吵鬧鬧

阮的一生獻予恁兜，才知幸福是吵吵鬧鬧。

Guán ê it-sing hiàn hōo lín tau, tsiah tsai hīng-hok sī tshá-tshá-nāu-nāu.

│等待返去的時陣若到　我會讓你先走

等待轉去的時陣若到，我會讓你先走。

Tán-thāi tńg-khì ê sî-tsūn nā kàu, guá ē niū lí sing tsáu.

│因為我會嘸甘　放你為我目屎流

因為我會毋甘，放你，為我目屎流。

In-uī guá ē m̄-kam, pàng lí, uī guá ba̍k-sái lâu.

│有一日咱若老　有媳婦子兒友孝

有一日咱若老，有新婦囝兒有孝。

Ū tsi̍t-li̍t lán nā làu, ū sin-pū kiánn-jî iú-hàu.

│你若無聊　拿咱的相片　看卡早結婚的時陣　你外緣投

你若無聊，提咱的相片，看較早結婚的時陣，你偌緣投。

Lí nā bô-liâu, the̍h lán ê siong-phìnn, khuànn khah-tsá kiat-hun ê sî-tsūn lí guā iân-tâu.

│穿好穿醜無計較　怪東怪西嘛袂曉

穿好穿䆀無計較，怪東怪西嘛袂曉。

Tshīng-hó-tshīng-bái, bô kè-kàu, kuài-tang-kuài-sai mā bē-hiáu.

│你的心我會永遠記條條　因為我是你的家後

你的心我會永遠記牢牢，因為我是你的家後。

Lí ê sim, guá ē íng-uán kì-tiâu-tiâu, in-uī guá sī lí ê ke-āu.

│阮將青春嫁置恁兜　阮對少年就跟你跟甲老

阮將青春嫁佇恁兜，阮對少年就綴你綴甲老。

Guán tsiong tshing-tshun kè tī lín tau, guán tuì siàu-liân tiō tuè lí tuè kah lāu.

│人情世事已經看透透　有啥人比你卡重要

人情世事已經看透透，有啥人比你較重要。

Lîn-tsîng-sè-sū í-king khuànn-thàu-thàu, ū siánn-lâng pí lí khah tiōng-iàu.

│阮的一生獻乎恁兜　才知幸福是吵吵鬧鬧

阮的一生獻予恁兜，才知幸福是吵吵鬧鬧。

Guán ê it-sing hiàn hōo lín tau, tsiah tsai hīng-hok sī tshá-tshá-nāu-nāu.

│等待返去的時陣若到　你會讓我先走

等待轉去的時陣若到，你會讓我先走。

Tán-thāi tńg-khì ê sî-tsūn nā kàu, lí ē niū guá sing tsáu.

│因為我會嘸甘　看你為我目屎流

因為我會毋甘，看你，為我目屎流。

In-uī guá ē m̄-kam, khuànn lí, uī guá ba̍k-sái lâu.