│到底幾百年 若感覺目一下睨

到底幾百年 若感覺目一下𥍉

tàu-té kuí pah nî, ná kám-kak ba̍k tsi̍t-ē nih

│東南西北門 阮的名字

東南西北門 阮的名字

tang lâm sai pak mn̂g, gún ê miâ-jī

│鬧熱的鑼鼓聲 嘛響起流行歌

鬧熱的鑼鼓聲 嘛響起流行歌

lāu-jia̍t ê lô-kóo siann, mā hiáng khí liû-hîng-kua

│踅佇阮拄才補好的 厝瓦

踅佇阮拄才補好的厝瓦

se̍h tī gún tú-tsiah póo hó ê tshù-hiā

│運河慢慢流 流過春夏秋冬的岸

運河慢慢流 流過春夏秋冬的岸

ūn-hô bān-bān lâu, lâu kuè tshun-hā tshiu-tang ê huānn

│阮坐佇這 顧城

阮坐佇遮顧城

gún tsē tī tsia kòo siânn

│

.

.

│迎新又去舊 是好歹也過一年

迎新又去舊 是好䆀嘛過一年

ngiâ-sin iū khì-kū, sī hó-bái mā kuè tsi̍t nî

│舉頭還是十六的月較圓

攑頭猶是十六的月較圓

gia̍h-thâu iáu-sī tsa̍p-la̍k ê ge̍h khah înn

│出入攏平安 是美醜好額散

出入攏平安 是媠䆀好額散

tshut-ji̍p lóng pîng-an, sī suí bái hó-gia̍h sàn

│二扇門 拍開的未來 真遠

兩扇門 拍開的未來 真遠

nn̄g sìnn mn̂g, phah khui ê bī-lâi, tsin hn̄g

│

.

.

│禿額的石敢當 有肉臊香的風

禿額的石敢當 有肉燥芳的風

thuh-hia̍h ê tsio̍h-kám-tong, ū bah-soh phang ê hong

│黃昏的無尾巷 惦惦無聲

黃昏的無尾巷 恬恬無聲

hông-hun ê bô-bué-hāng, tiām-tiām bô-siann

│城市換新衫 大樓擠走稻埕

城市換新衫 大樓𤲍走稻埕

siânn-tshī uānn sin-sann, tuā-lâu kheh tsáu tiū-tiânn

│出外的人最驚拍無見 心肝

出外的人 上驚拍毋見心肝

tshut-guā ê lâng, siōng kiann phàng-kìnn sim-kuann

│褪色的門板 總有人又來漆紅紅

退色的門枋 總有人又來漆紅紅

thè-sik ê mn̂g-pang, tsóng ū-lâng iū lâi tshat âng-âng

│阮猶佇這 顧城

阮猶佇遮顧城

gún iáu tī tsia kòo siânn

│

.

.

│點啊點叮噹 天公伯仔慢慢啊點

點啊點叮噹 天公伯仔慢慢仔點

tiám--ah tiám tin-tang, thinn-kong-peh--á bān-bān-á tiám

│要走 要留 半點不由人

欲走欲留半點不由人

beh tsáu beh lâu puàn-tiám put iû lâng

│日頭落又起 是時間的掌中戲

日頭落又起 是時間的掌中戲

ji̍t-thâu lo̍h iū khí, sī sî-kan ê tsiáng-tiong-hì

│二扇門 再會又團圓 創治

兩扇門 再會又團圓 創治

nn̄g sìnn mn̂g, tsài-huē iū thuân-înn, tshòng-tī

│

.

.

│媽祖保庇哦 觀音媽保庇哦

媽祖保庇喔 觀音媽保庇喔

Má-tsóo pó-pì--ooh, Kuan-im-má pó-pì--ooh

│土地公保庇哦 天上眾神保庇哦

土地公保庇喔 保庇喔 天上眾神保庇喔

Thóo-tī-kong pó-pì--ooh, pó-pì--ooh, thian-siōng tsiòng-sîn pó-pì--ooh

│

.

.

│砲仔響上天 向望來年又豐年

砲仔響上天 向望來年又豐年

phàu á hiáng tshiūnn-thian, ǹg-bāng lâ-nî iū hong-nî

│歡喜就去愛 愛不著嘛歡喜

歡喜就去愛 愛袂著嘛歡喜

huann-hí tō khì ài, ài buē tio̍h mā huann-hí

│門關門又開 等五更雞就啼

門關門又開 等五更雞就啼

mn̂g kuinn mn̂g iū khui, tán gōo-kinn ke tsiū thî

│二扇門 一年又一年

兩扇門 一年又一年

nn̄g sìnn mn̂g, tsi̍t nî iū tsi̍t nî

│日子

日子

ji̍t-tsí