│故鄉的鳳凰花　總是出現佇南風起的六月

故鄉的鳳凰花 總是出現佇南風起的六月

kòo-hiong ê hōng-hông-hue, tsóng-sī tshut-hiān tī lâm-hong khí ê la̍k--gue̍h

│風若吹　紅紅的花　著親像蝴蝶佇天頂飛

風若吹 紅紅的花 就親像蝴蝶佇天頂飛

hong nā tshue, âng-âng ê hue, tiō tshin-tshiūnn ôo-tia̍p tī thinn-tíng pue

│風若吹　幼幼的樹葉　著親像青色的雪

風若吹 幼幼的樹葉 就親像青色的雪

hong nā tshue, iù-iù ê tshiū-hio̍h, tiō tshin-tshiūnn tshinn-sik ê seh

│每冬的六月　離別的時節　想起故鄉的鳳凰花

每冬的六月 離別的時節 想起故鄉的鳳凰花

muí tang ê la̍k--gue̍h, lī-pia̍t ê sî-tseh, siūnn-khí kòo-hiong ê hōng-hông-hue

-

.

.

│故鄉的鳳凰花　總是出現佇懷念的土地

故鄉的鳳凰花 總是出現佇懷念的土地

kòo-hiong ê hōng-hông-hue, tsóng-sī tshut-hiān tī huâi-liām ê thóo-tē

│細漢的時　媽媽牽阮的手行路去讀冊

細漢的時 媽媽牽阮的手 行路去讀冊

sè-hàn ê sî, má-mah khan gún ê tshiú, kiânn-lōo khì tha̍k-tsheh

│幾蛇路攏是鳳凰花

規逝路攏是鳳凰花

kui tsuā lōo lóng-sī hōng-hông-hue

│初戀的時　伊嘛牽著阮的手　散步　話仙　約會

初戀的時 伊嘛牽著阮的手 散步 話仙 約會

tshoo-luân ê sî, i mā khan tio̍h gún ê tshiú, sàn-pōo, uē-sian, iok-huē

│迄條巷子底　鬧熱的路街　攏是故鄉的鳳凰花

彼條巷仔底 鬧熱的路街 攏是故鄉的鳳凰花

hit tiâu hāng-á-té, lāu-jia̍t ê lōo-ke, lóng-sī kòo-hiong ê hōng-hông-hue

-

.

.

│故鄉的鳳凰花　總是出現佇睏未去的暗瞑

故鄉的鳳凰花 總是出現佇睏袂去的暗暝

kòo-hiong ê hōng-hông-hue, tsóng-sī tshut-hiān tī khùn bē khì ê àm-mî

│誰人會知　過去的日子　是一去不回斷線的風吹

啥人會知 過去的日子 是一去不回 斷線的風吹

siánn-lâng ē tsai, kuè-khì ê ji̍t-tsí, sī tsi̍t khì put huê, tn̄g-suànn ê hong-tshue

│誰人會知　未來的日子　是幸福悲傷滿足抑是後悔

啥人會知 未來的日子 是幸福悲傷滿足抑是後悔

siánn-lâng ē tsai, bī-lâi ê ji̍t-tsí, sī hīng-hok pi-siong buán-tsiok ia̍h-sī hiō-hué

│心內攏是話　沒人聽我說只有故鄉的鳳凰花

心內攏是話 無人聽我說 只有故鄉的鳳凰花

sim-lāi lóng-sī uē, bô-lâng thiann guá sueh, tsí-ū kòo-hiong ê hōng-hông-hue